«Be Honest — Be You» университетішілік челлендж

2026 жылғы 25 мамырда Ablai Khan University-де «Таза сессия» акциясы аясында академиялық адалдық, парасаттылық қағидаттарын насихаттауға және студенттер мен профессор-оқытушылар құрамы арасында сыбайлас жемқорлыққа қарсы нөлдік төзімділік мәдениетін қалыптастыруға бағытталған «Be Honest — Be You» университетішілік челленджі өтті.

Іс-шара әділдікке, интеллектуалдық еңбекке құрметке, жауапкершілікке және білім беру үдерісіне адал көзқарасқа негізделген заманауи білім беру құндылықтары туралы ашық диалог алаңына айналды. Кездесу барысында университеттік ортада сенім, ашықтық және адалдық мәдениетін қалыптастырудың маңыздылығы талқыланды. Бұл қағидаттар сапалы білім мен тұлғаның кәсіби қалыптасуының негізі ретінде атап өтілді.

Кездесудің спикерлері тәрбие жұмысы және әлеуметтік мәселелер жөніндегі проректор Т.В. Серёжкина және университеттің комплаенс-офицері М.Т. Ибрагимова болды.

Өз сөздерінде спикерлер академиялық адалдықтың сапалы білім мен болашақ мамандардың кәсіби дамуының ажырамас бөлігі екенін атап өтті. Академиялық этика нормаларын сақтау, емтихан сессиясы кезеңіндегі білім алушылардың жауапкершілігі, көшіру, плагиат және өзге де адал емес әрекеттерге жол бермеу мәселелеріне ерекше назар аударылды.

Сонымен қатар, студент үшін парасаттылық ең алдымен оқу тапсырмаларын адал орындау, оқытушылар мен топтастарының еңбегін құрметтеу, емтиханға өз бетінше дайындалу және өз оқуына жауапкершілікпен қарау екені атап өтілді. Ал оқытушы үшін парасаттылық — бағалаудағы объективтілік пен әділдік, кәсіби этиканы сақтау, білім беру үдерісінің ашықтығы, сондай-ақ академиялық ортада сенім мен өзара құрмет атмосферасын қалыптастыру болып табылады.

Челлендж барысында қатысушылар «Be Honest — Be You» қағидаттарын қолдап, адалдық, ашықтық және жауапкершілік тек оқу үдерісінде ғана емес, болашақ кәсіби қызметте де маңызды құндылықтар екенін атап өтті.

Осындай іс-шараларды өткізу университетте академиялық парасаттылық мәдениетін нығайтуға, сыбайлас жемқорлыққа қарсы сананы дамытуға және жауапты студенттік қауымдастықты қалыптастыруға ықпал етеді.